د امریکا له سی بی اس ټلویزیون سره د حامد کرزي د مرکې متن

| 13 October 2016, 20:03

 

 

لارا لوګن:

 

ښاغلی جمهور رئیس! د افغانستان موضوع د امریکا په انتخاباتي مبارزو کې د نوماندانو لخوا د بحث وړ نده، دغه کوم پیغام کولای شي تاسو ته ولېږدوي؟

 

جمهور رئیس کرزی:

 نه پوهېږم، ما هېڅکله په دې اړه فکر ندی کړی، مګر، هو، په دې اړه مې لوستي دي. خو هیڅکله مې توجه نده ورته کړې. ښایي نوماندانانو ته دا مسأله یوه حل شوې موضوع وي، ښایي تصمیم یې نیولی وي چې په دې اړه خبرې ونکړي، خو زموږ لپاره د امریکا په انتخاباتي مبارزو کې د افغانستان په اړه خبرې کول د بحث وړ ندي.

 

لارا لوګن:

 خو هغه پیغام چې دا مسأله یې کولای شي امریکایانو ته ورسوي دا دی چې افغانستان نور مهم ندی او نور هېر شوی دی؛

 

جمهور رئیس کرزی:

افغانستان د امریکا د حکومت او خلکو لپاره مهم دی. که امریکا او ناټو د هغه موخې لپاره چې افغانستان ته راغلي، په لاس راغلي وي، نو بیا سمه ده چې افغانستان نور مهم ندی او باید یوه عادي موضوع وي چې هیله لرم ډېر ژر هغې ورځې ته ورسېږو، خو دا هدف ندی په لاس راغلی او په همدې اساس باید په څو لحاظه مهم وي. په افغانستان کې ذهنیتونه او انګېرنې متفاوتې دي، هیله لرم چې زموږ هېواد د امریکایانو او نورو لپاره نور د بحث موضوع نه وي او د نورو ملتونو په څېر وکولای شو عادي او په سوله کې ژوند ولرو.

 

لارا لوګن:

خو کولای شﺉ امریکایانو ته ووایاست چې له دې ټولو کلونو وروسته په افغانستان کې څه په خطر کې دي؟

 

جمهور رئیس کرزی:

ناټو او امریکا افغانستان ته د ترورېزم په خاطر توجه وکړه او راغلل. ترورېزم له منځه نه دی تللی، برعکس زیات شوی دی، دا چې ولې زیات شوی هغه پوښتنه ده چې موږ ټول یې په اړه پوښتو، په همدې اساس که دا موضوع د امریکا لپاره د اندېښنې وړ وي، د امریکا د خلکو د امنیت لپاره اندېښنه بلل کېږي، نو دا هدف ندی په لاس راغلی، آیا پدې پاتې موده کې کېدلای شي دې موخې ته ورسېږو او آیا د امریکا حکومت اړتیا لري چې د اوږدې مودې لپاره پاتې شي تر څو له افغانستان سره مرسته وکړي او د ترورېزم له پاتې شونو سره چې په هر ځای کې  دي او هر څوک دي، ادامه ورکړي، دا مسأله د امریکا او ټولې نړۍ لپاره یو ضروري امر دی. خو ددې لپاره چې دغې موخې ته ورسېږو، خو اړتیا شته چې د هغه ګواښ په اړه چې موږ یې په وړاندې مبارزه کوو یو سم تعریف وجود ولري، زما په اند په تېرو لسو کلونو کې دې تعریف وجود نه درلود، سربېره پر دې چې موږ یې غوښتونکي شوو او په دې برخه کې زموږ پر هڅو سربېره بیا هم دښمن تعریف کړو.

 

لارا لوګن:

نو ددښمن سم تعریف څه دی؟

 

جمهور رئیس کرزی:

زما په نظر سم تعریف  هماغه د امن لرونکو پتنځایونو موجودیت دی چې موږ ددغو پټنځایونو په وړاندې چې په هر ځای کې دي څه وکړو. کله چې موږ دتروریست په اړه خبرې کوو، باید پوه شو چې تروریست څوک دی؟ د ترورېزم په اړه زموږ تعریف څه دی؟ آیا یو کلیوال افغان چې په خپل کور کې د یوه شي په اړه په قهر شوی او وسله یې اخیستې، تروریست دی؟ آیا ترورېزم هماغه څه دي چې نن یې لویدیځ بلوا او شورش تعریفوي؟

موږ یې بلوا نه بولو، که افغانستان له بلوا او شورش سره مخامخ دی، نو دا د افغانستان کورنۍ ستونزه ده او امریکا، اروپا او ناټو پکې کار نلري. دا کار کورنۍ نارضیاتي ده، یو کورنی اختلاف نظر دی او د افغانستان په خلکو پورې اړوندېږي چې د حل لپاره یې کومه لاره پیدا کوي. موږ ددې ستونزې د حل لپاره د ناټو وسلې ته اړتیا نلرو، خو که دا ستونزه ترورېزم وي، نو ترورېزم نړیوال تعریف لري چې په هر چا پورې چې د یوې انګېزې یا ایډیالوژۍ لپاره قتل او وژنې کوي، اړه پیدا کوي، دا یو داسې څه دي چې موږ یې باید پر وړاندې په ګډه مبارزه وکړو او موږ غواړو چې دا مبارزه تر سره شي. نو په همدې اساس، تر اوسه دا تعریف نشته او یا خلط یا ګډ شوی دی. 

 

لارا لوګن:

نو تاسې دا جګړه د بلوا په نوم نه پېژنﺉ، بلکې د ترورېزم په نامه یې پېژنﺉ؟

 

جمهور رئیس کرزی:

بې له شکه دا د ترورېزم جګړه ده، موږ هر وخت پدې اړه غږ پورته کړی دی، همېشه او له پیل راهیسې او موږ نه غواړو چې دا جګړه بلوا یا شورش وبلل شي، که دا جګړه شورش وي، نو امریکا په افغانستان کې هېڅ کار نلري.

 

لارا لوګن:

کله چې تاسو وایاست ترورېزم ډېر شوی دی، دقیقاً ستاسو موخه څه ده؟

 

جمهور رئیس کرزی:

که ترورېزم د بیګناه خلکو پر وړاندې د تاوتریخوالي د روا بللو په معنی وي، که ترورېزم زموږ د متحدینو پر وړاندې د تاوتریخوالي په معنی وي، نو ترورېزم زیات شوی دی او له منځه تللی ندی. موږ هره ورځ په افغانستان کې د تروریستي پېښو شاهدان یو او نن دا پېښې په پاکستان کې هم رامنځ ته کېږي.  نو که هدف د افغانستان د خلکو لپاره د امنیت تأمین وي، موږ لا تراوسه هغه ته نه یو رسیدلي.

 

لارا لوګن:

تاسو د تروریست د تعریف په اړه خبرې وکړې، ستاسو په نظر باید تروریست څه ډول تعریف شي، ځواب څه دی، ستاسو په نظر تروریست څوک دی؟

 

جمهور رئیس کرزی:

تروریست هغه چاته ویل کېږي چې بې ګناه خلک وژني، ښوونځي سوزوي، کروندې ورانوي، د انسانانو ژوند اخلي او یا د هر ایډیالوژیک دلیل او یا بل هر څه له مخې په تاوتریخوالي لاس پورې کوي، داسې څوک زموږ په نظر تروریست دی.

 

لارا لوګن:

نو ستاسو لپاره د طالبانو، القاعدې او حقاني شبکې تر منځ فرق نشته، ټول تروریستان دي؟

 

جمهور رئیس کرزی:

هر څوک چې په تاوتریخوالي لاس پورې کوي او بې ګناه خلک وژني او د نړۍ په هره برخه کې د خلکو ژوند  او دارایي له منځه وړي، ترورېست دی.

 

لارا لوګن:

له افغانستان څخه د امریکایي ځواکونو د وتلو له پیل سره به، وروسته څه شی له ځانه پرېږدي؟

 

جمهور رئیس کرزی:

ښه، پروګرام دا دی چې افغان ځواکونو ته د ۲۰۱۳کال تر پایه امنیتي مسؤولیتونه انتقال شي او د ۲۰۱۴کال تر پایه امریکایي او بهرني ځواکونه په بشپړه توګه افغانستان پرېږدي، خو د هغو همکاریو په چوکاټ کې چې له متحده ایالاتو او نورو هېوادونو سره یې لرو، ددغو ځواکونو یو شمېر به په افغانستان کې پاتې شي او هدف یې د ترورېزم پر وړاندې مبارزه او د افغان ځواکونو روزل او تجهیز دی او هم به په افغانستان او سیمه کې د امریکا د ګټو تأمین وي او په دې اړه مشخصاً په یوه بېل امنیتي سند کې چې هغه به هم لاسلیک کړو، ددغو ځواکونو د شمېر او خدمت موده تعین شي، مګر نور پاتې ځواکونه به له افغانستان نه په بشپړه توګه ووزي

 

 

 

لارا لوګن:

له افغانستان نه د امریکایي ځواکونو له وتلو وروسته به امنیتي وضعیت څه ډول وي، یعنې د جګړې په ډګر کې ددغو ځواکونو له وتلو وروسته وضعیت څه ډول ارزوﺉ؟

 

جمهور رئیس کرزی:

وګورﺉ! وضعیت نور د جګړې د ډګر په شان ندی، موږ له نېکه مرغه له هغه پړاو څخه تېر شوي یو، خو داسې هم نده چې وضعیت آرام شوی دی. موږ نور د متعارفې جګړې په ډګر کې نه یو چې طالبان یا تروریستان یا بل هر نوم چې ورکوﺉ له دې زیات د متعارفې جګړې توان ولري او د نورو پراخو جګړو د ترسره کولو لپاره جګړه اییز ځواک نلري، خو د چاودنو، د سړک غاړې بمونو د ځای پر ځای کولو، د انتحاري د لېږلو او چاودنو او وژلو توان به ولري. متاسفانه دا ستونزې تر اوسه ندي حل شوي، او تر هغه به حل نشي چې له پولې هاخوا په پاکستان کې زموږ له دوستانو سره د صداقت په فضا کې او په مؤثر ډول ددې مسألې په اړه خبرې ونشي.

 

لارا لوګن:

ولې امریکا تر اوسه نده توانېدلې چې د پاکستان موضوع حل کړي، ستاسو نظر څه دی؟

 

جمهور رئیس کرزی:

ښایي د سیاسي مسائلو په خاطر،

 

لارا لوګن:

ددې ټولو قیمت تاسوته  څنګه تمام شوی دی؟

 

جمهور رئیس کرزی:

زموږ لپاره ډېر ګران او له مصیبت نه ډک تمام شوی دی.

 

 

 

لارا لوګن:

که په پاکستان کې د امنو پټنځایونو موضوع په تېرو کلونو کې حل شوې وای، آیا نن به په افغانستان کې وضعیت بل ډول نه و؟

 

جمهور رئیس کرزی:

په بشپړه توګه به یې توپیر درلودای، سوله آېز به وای، لا به پرمختللی وای، باثباته به وای او یوه ټولنه به وای چې خپله به یې د سوکالۍ لپاره ګام اخیست.

 

لارا لوګن:

آیا دا موضوع تاسې نه اندېښمن کوي؟

 

جمهور رئیس کرزی:

ډېر زیات، او موږ خپله دا اندېښنه په ډاګه کړې ده.

 

لارا لوګن:

آیا فکر کوﺉ چې ددې ټولو په وړاندې، ناتوانه شوي یاست؟

 

جمهور رئیس کرزی:

تر کومه  ځایه چې په سیمه کې په امریکا او د هغه په چلند پورې اړه لري، هو موږ خپل ځانونه ناتوانه احساسوو، ځکه چې امریکا او سیاست یې د هغه څه په اړه تصمیم نیسي چې خپلې ګټې یې بولي، خو هغه څه چې موږ یې په اړه ځانونه ناتوانه احساسوو دا دي چې موږ څه غواړو او بل دا چې څه غواړو تر سره یې کړو.

د هغه دلیل په اساس چې موږ له پاکستان سره پخپله خبرې پیل کړې، د هغه دلیل په اساس چې موږ له پاکستان سره په جدي ډول ډیالوګ پیل کړ، په هغه دلیل چې موږ څلور پنځه کاله وړاندې پر پاکستان باندې له انتقاد نه لاس واخیست، د هغه دلیل په اساس چې موږ په خپله د سولې بهیر پیل کړ، حتی په داسې شرایطو کې چې دا کار زموږ د متحدینو د غوښتنو پر خلاف و، پدې خاطر و چې موږ احساس وکړ چې د ترورېزم د مسألې لپاره صادقانه غیر سیاسي لاره وجود نلري او دا کار مو د حل لارو د موندلو لپاره تر سره کړ او په همدې دلیل اوس هم ادامه ورکوو.

 

لارا لوګن:

آیا دا احساس مو کاوه چې په هغه وخت کې ټول کارونه چې ستاسو په توان کې وو، امریکایي دیپلوماتانو ته د قناعت ورکولو لپاره مو تر سره کړل؟

 

جمهور رئیس کرزی:

هو!، له هغه څه نه زیات چې په توان کې مو وو!

 

لارا لوګن:

آیا د تړلو دروازو تر شا ستاسو د ملاقاتونو په ترڅ کې غږونه او فریادونه پورته کېدل؟

 

جمهور رئیس کرزی:

ډېر زیات!

 

لارا لوګن:

باید ډېر مایوسوونکي واوسي!

 

جمهور رئیس کرزی:

هو، مایوسوونکي دي او مایوسوونکي وو!

 

لارا لوګن:

جالبه ده چې وایاست ترورېزم زیات شوی دی. ما تېر کال د امریکا او افغانستان د استخباراتو له یو شمېر مسؤولینو، محلي مشرانو او امریکایي نظامیانو سره په افغانستان کې د القاعدې د وضعیت په اړه خبرې درلودې او څه مو چې پیدا کړل، دا وو چې نن ورځ په افغانستان کې القاعده له هغه څه نه ډېره فعاله او پیاوړې شوې ده چې اکثره امریکایان یې په اړه خبر لري، القاعده روزنیز کمپونه پر مخ وړي، د امریکایي او افغان ځواکونو پر خلاف بریدونه سازمان کوي، اورپکو ډلو ته پیسې، وسلې او معلومات ورکوي او هغوی ته نظامي تکتیکونه ور زده کوي، فکر کوم داسې دښمن نه ګڼل کېږي چې ماتې یې خوړلې وي.

 

جمهور رئیس کرزی:

ښه، نه پوهېږم چې تر کومه حده القاعده په افغانستان کې حضور لري، نه پوهېږم چې آیا دوباره افغانستان ته راګرځېدلې، حتی نه پوهېدلو چې القاعده تر کومه حده چې موږ یې په اړه خبرې کوو، وجود ولري، خو پوهېږم چې تاوتریخوالی وجود لري، پوهېږم چې هره ورځ یو زیات شمېر بې ګناه وګړي مري، پوهېږم چې حد اقل له لسو نه تر شلو پورې د افغانستان امنیتي ځواکونه، پولیس، اردو او د استخباراتو کارکوونکي خپل ځانونه له لاسه ورکوي. په همدې اساس په واقعیت کې پوهېږم چې امنیتي پېښې لکه بریدونه، چاودېدونکي مواد او بمونه چوول کېږي، د انتحاري برید کوونکو شمېر ندی کم شوی، لا هم په هغه مرحله کې نه یو چې مشخصاً ووایو چې دغه القاعده دي یا نور تروریستان، خو د هغې فرضیې په اساس چې القاعده روغ رمټه تللې او خپل حضور یې له ۲۰۰۱کال نه له وتلو وروسته، ډېر کړی دی، دا مسأله ثابتوي چې موږ په سمه توګه عمل ندی کړی، که امریکایانو، ناټو او موږ په ګډه سم کار تر سره کړی وای، باید القاعده مو په بشپړه توګه له منځه وړې وای او یا لږ تر لږه افغانستان ته یې د بیا راګرځېدو مخه مو نیولې وای.  

 

لارا لوګن:

نو، القاعده افغانستان ته بیا راګرځېدلې؟

 

جمهور رئیس کرزی:

نه پوهېږم، لکه مخکې مې چې وویل، زه واقعاً معلومات نلرم، هېڅکله یو افغان هم ماته نه دی راغلی او ماته یې ندي ویلي چې القاعده په فلاني ځای کې ده او یو مشخص کلی او سیمه یې راته نده ښودلې چې هلته القاعده حضور لري، موږ عرب، چیچیني، ازبک او یا د نړۍ د نورو برخو افراطي ترهګر لیدلي دي چې نیول شوي او بندیان شوي دي، که چېرې تاسو له پاکستاني افرادو پرته دغه غیر افغان کسان او غیر منطقوي لوبغاړي چې په افغانستان کې نیول شوي دي، القاعده بولﺉ؟، هو القاعده په افغانستان کې وجود لري، خو دې ټولو ته القاعده نشو ویلای، دوی یو زیات شمېر هغه تروریستان دي چې موږ نیولي او په افغانستان کې لیدلي دي.

 

لارا لوګن:

د امریکا اردو هغوی القاعده بولي، دوی دا حقیقت افشا کړ چې په تېرو څو میاشتو کې یې ددغو کسانو پر خلاف په یوازې توګه لسګوني نظامي عملیات تر سره کړي دي او دا چې القاعده په افغانستان کې د هغو تروریستانو د کمپونو روزنه پر مخ وړي چې د بهرنیو ځواکونو پر خلاف ډېر بریدونه سازمانه وي

 

جمهور رئیس کرزی:

ښه، که دوی القاعده وي، د امریکا اردو دوی القاعده بولي، راځﺉ ومنو چې دوی القاعده دي. موږ باید دا پوښتنه مطرح کړو چې القاعده څه ډول افغانستان ته بیا راوګرځېده؟ دا کار څه ډول رامنځ ته شو؟ حتماً یو ناسم کار تر سره شوی دی چې په نتیجه کې یې داسې شوي دي

 

لارا لوګن:

کوم ناسم کار ترسره شوی دی؟

 

جمهور رئیس کرزی:

دا یوه داسې مسأله ده چې باید کښېنو او بحث پرې وکړو، دا یوه پوښتنه ده چې په افغانستان کې یې لرو، دا څه ډول وشول چې د افغانستان قلمرو په معینو ساحو کې د القاعدې تر نفوذ لاندې قرار لري، که دوی د القاعدې کسان وي او د القاعدې په خدمت کې وي او زموږ په هېواد کې پټن ځایونه لري، دا یوه ډېره جدي موضوع ده، یوه پوښتنه چې جدي ځواب ته اړتیا لري.

 

لارا لوګن:

څه فکر کوﺉ چې ددې پوښتنې ځواب څه دی؟

 

 

 

جمهور رئیس کرزی:

که دا مسأله سمه وي، د پوښتنې ځواب دا دی چې موږ د القاعدې دا کسان سم تعقیب کړي ندي، او یا دا چې د دوی پر خلاف مؤثره مبارزه نیمګړتیاوې لري او دا موضوع بیا له هېواد نه بهر د پټنځایونو مسألې ته ورګرځي….

 

لارا لوګن:

ښاغلی جمهور رئیس، څوک چې دا مرکه ګوري، فکر به وکړي چې څه ډول تاسې په دې موضوع باندې په رښتیا نه پوهېږﺉ، تاسو جمهور رئیس یاست، استخباراتي مراجع تاسو ته معلومات درکوي، امریکا تاسو ته معلومات درکوي، تاسو باید پوه شﺉ چې له چا سره جنګېږﺉ!

 

جمهور رئیس کرزی:

موږ د افغانانو په څېر پوهېږو چې له چا سره جنګېړو، خو کله چې له مانه د القاعده او دغو تعریفونو په اړه په صریح ډول پوښتﺉ، په هغه صورت کې به له پېچلتیاوو سره مخ شو، امنیتي مراجع ماته راپور راکوي چې مثلاً دوی چیچیني اتباع نیولي دي، هغوی څوک دي؟ هغوی د چیچین دي، په پاکستان کې یې روزنه لیدلې او افغانستان ته راغلي دي تر څو وجنګېږي او افغانان په قتل ورسوي.

استخباراتي مسؤولین هېڅکله ماته ندي راغلي چې ووایي دوی القاعده نیولې ده، ماته راځي او راپور راکوي چې د ازبکستان د اسلامي جنبش غړي زموږ په خاوره کې جرمونه او وژنې کړي دي، ماته راځي او د پاکستاني اتباعو د نیولو راپور راکوي، هېڅکله دوی هغه القاعده ندي بللي، هغوی زموږ په خاوره کې د عربو د حضور خبرې کوي، هېڅکله یې القاعده ندي بللي، په همدې دلیل دي چې زه د "القاعده" اصطلاح او یا هغه ته ورته نومونه او القاب د نظامي کسانو او ډلو لپاره نه استعمالوم.

په واضحه توګه، په دې سیمه کې یو ځای شته چې په هغه کې له تروریستي ډلو څخه په دوامداره توګه ملاتړ کېږي، سرچینې، اکمالات او پیسې ورته برابرېږي او روزنه یې کېږي، ستاسو خوښه هغوی القاعده بولﺉ که د ازبکستان اسلامي جنبش، حقاني شبکه او یا طالبان یې نوموﺉ. هغوی لا هم وجود لري او ددې توان لري چې لس کاله نور هم پاتې شي، راشي او موږ ته زیان واړوي، ستاسو سرتېري او موږ په قتل ورسوي او زموږ ملکي وګړي ووژني. له ما سره دا سوال نشته چې آیا دوی او که نورې تروریستي ډلې القاعده ونوموم، بلکې پوښتنه او اصلي خبره دا ده چې موږ کوم ناسم کار کړی دی چې دوی لا هم پدې توانېږي تر څو زموږ خلکو ته زیان ورسوي، دا مسأله زما لپاره د افغانستان د جمهور رئیس په توګه، مهمه مسأله ده او دا هغه موضوع ده چې تقریباً هره ورځ مې د امریکا له متحده ایالاتو سره شریکه کړې ده.

 

لارا لوګن:

آیا له هغو ځوابونو چې تاسو یې تر لاسه کوﺉ، راضي یاست؟

 

جمهور رئیس کرزی:

نه ، هېڅکله ، دا زموږ یوه له ستونزو څخه پاتې شوې ده

 

لارا لوګن:

ما ستاسو له والیانو سره په دوو ولایتونو، کونړ او نورستان کې خبرې وکړې، هغوی ماته وویل چې القاعده ددوی په سیمو کې دکتنې وړ حضور لري، او ډېر غړي او وسلې لري….

 

جمهور رئیس کرزی:

دا مسأله سمه نده چې په دغو ولایتونو کې د القاعدې غړي او وسلې له افغان ځواکونو څخه زیاتې وي.

 

لارا لوګن:

تاسو له دې موضوع سره موافق نه یاست؟

 

جمهور رئیس کرزی:

نه، اصلاً موافق نه یم!

 

لارا لوګن:

د افغانستان استخبارات، د افغانستان رهبران، د امریکا استخبارات او بل هر څوک دا مني چې د کونړ ولایت یو ځل بیا په افغانستان کې د القاعدې په مؤثره اډه بدل شوی دی.

 

جمهور رئیس کرزی:

دا څرګندونې په بشپړ ډول ناسمې دي، اصلاً حقیقت نلري، که دا مسأله سمه وي، نو پدې معنی ده چې په افغانستان کې د امریکا د متحده ایالاتو حضور د ترورېزم پر خلاف د جګړې او یا د افغانانو لپاره د امنیت راوستلو لپاره هېڅ ګټه نده کړې.

 

لارا لوګن:

وګورﺉ، د القاعدې جګپوړي مشران د امریکایي ځواکونو لخوا په کونړ ولایت کې وژل شوي دي او په تېرو دوو کلونو کې د امریکایي ځواکونو لخوا ددوی یو شمېر نور مشران نیول شوي دي.

 

جمهور رئیس کرزی:

هو، سمه ده، خو څه وشول؟ نو، په دې تېرو لسو کلونو کې امریکایي زیات شمېر ځواکونو په کونړ کې څه کول؟ پوښتنه همدلته ده، زه له دوی سره موافق نه یم، خو که حقیقت ولري، که زما خبرې سمې نه وي او امریکایي افسران او زموږ استخباراتي مسؤولین سم وایي، نو، پدې صورت کې وضعیت تر هغه نه ډېر جدي دی او باید ځواب ورکړل شي. ولې باید، له لسو کلونو وروسته په هغه ولایت کې وضعیت دارنګه وي، باور نلرم چې دا مسأله دې حقیقت ولري.

 

لارا لوګن:

موږ د دښمن له مشرانو، د پاکستان سرحدي سیمو ته په نیږدو ساحو او دغه راز په غزني ولایت کې له طالب قوماندانانو سره خبرې کړي. د القاعدې په اړه د طالبانو نظر دا دی چې طالبان او القاعده یو دي، وایي چې دوی ټول زموږ وروڼه دي.

 

جمهور رئیس کرزی:

هو، ښایي ځینې یې ورته احساس ولري، خو زه اصل مطلب ته راځم، که دا سمه وي چې القاعده په افغانستان کې حضور لري او فعالیت کوي او افراد یې زموږ د ځواکونو په پرتله ډېر او سمبال دي، نو څوک د القاعدې او ترورېزم او د افغانانو لپاره د امنیت په ټینګښت او په سمه توګه د افغان ځواکونو په تجهیز کې ناکام شوي دي؟

 

لارا لوګن:

آیا تاسو د هغوی مسؤولیت پر غاړه اخلﺉ؟

 

جمهور رئیس کرزی:

نه، دا زموږ د افغانانو مسؤولیت ندی، بلکې د امریکا د متحده ایالاتو او ناټو مسؤولیت دی.

 

لارا لوګن:

آیا د افغانانو او امریکا ګډ مسؤولیت ندی؟

 

جمهور رئیس کرزی:

د دواړو مسؤولیت ندی.

 

لارا لوګن:

په څه دلیل؟

 

جمهور رئیس کرزی:

په دې خاطر چې په دې اړه مې له دوی سره په تکرار خبرې کړې دي، اجازه راکړﺉ یو ځل بیا تکرار کړم، زه پدې باور نلرم چې دا مسأله دې حقیقت ولري چې د کونړ او نورستان په ولایتونو کې دې د القاعدې غړي زموږ له ځواکونو څخه په زیات شمېر کې موجود وي، که دوی زموږ د ځواکونو له شمېر څخه ډېر وي، باید د ټولو ولایتونو کنټرول د دوی په اختیار کې وای، نو زه فکر کوم چې شمېر ډېر ندی، که وای نو اوس باید د حکومت کنټرول یې په لاس کې وای، چې نن یی، کنټرول له موږ سره دی. حتی که په کونړ ولایت کې حضور ولري، نو د امریکا حکومت او ناټو باید ماته راشي او ځواب ووایي چې ولې زموږ د خلکو پر دې ټولو قربانیو، د تروریستانو، طالبانو، القاعدې او دغه راز د بهرنیو ځواکونو د شپې لخوا د هوایي بمباریو له امله د زرګونو ملکي وګړو پر وژنې سربېره، لا هم د القاعدې د حضور په اړه خبرې کوو، نو دا ناکامي ده.

 

 

لارا لوګن:

څه فکر کوﺉ ددې ناکامۍ عواقب به څه وي؟

 

جمهور رئیس کرزی:

که دا ناکامي سمه وي، هېڅ امریکایي چارواکی چې ماته راغلی، دا موضوع یې ماته نده ویلې.

 

لارا لوګن:

دوی دا مسأله په خپلو مطبوعاتي اعلامیو کې خپره کړې ده….

 

جمهور رئیس کرزی:

هېڅکله یې ماته ندي ویلي، برعکس، زه د جنرال الن داسې لیکونه لرم، په هغه کې وایي چې په افغانستان کې امنیت ډېر ښه شوی دی او خلک د ښې حکومتوالۍ په تمه دي.

 

لارا لوګن:

آیا تاسو له دوی سره موافق یاست؟

 

جمهور رئیس کرزی:

پوهېږم، چې له دوی سره موافق نه یم

 

لارا لوګن:

آیا ددې مسألې په اړه دې هغه ته ویلي دي؟

 

جمهور رئیس کرزی:

هو، امنیت ښه شوی دی، خو په بشپړه توګه نه ، موږ د لوګر او وردګو په ولایتونو کې ستونزې لرو، د کونړ په ولایت کې هم ستونزې لرو، خو د کونړ موضوع فرق کوي، مګر زه په هېواد کې د امنیت د لویې مسألې په اړه خبرې نه کوم، په عمومي توګه امنیت ښه شوی دی، خو نه په بشپړه توګه. د القاعدې او د هغه د حضور په اړه چې تاسو ته په کوم قوت او اندازه د امریکایي او افغان مسؤولینو لخوا ویل شوي دي، هېڅکله داسې راپور ندی تر لاسه شوی چې ددارنګه وضعیت ښکارندویي کوي او په تېرو دوو یا دریو اوونیو کې د کونړ ولایت په اړه تقریبا په هره جلسه کې مو له امریکایي مسؤولینو سره بحث کړی دی، هغه هم پر دغه ولایت د پاکستان د توغندیو په اړه، خو د القاعدې دا موضوع هېڅکله نده مطرح شوې، هېڅکله یې ماته پدې اړه ندي ويلي. نو په همدې اساس، په هغه موضوع کې صحت او سموالی نه وینم.

 

لارا لوګن:

له څه کم دوو کلونو راهیسې داسې احساس کوم چې د امریکا په وړاندې ډېره غوصه وجود لري، په دې وروستیو کلونو کې ښکاري چې اړیکې لا خرابې شوي دي، خصومت او بدغوښتنه وجود لري، کوم ناسم کار شوی دی، ولې داسې احساس لرﺉ؟

 

جمهور رئیس کرزی:

زه په قهر نه یم، افغانستان د نا امیدۍ احساس کوي، که امریکایي مسؤولین وایي چې اوس مهال کونړ له القاعدې سره دی او یا دا چې د القاعدې د کسانو شمېر او تجهیزات له افغان ځواکونو نه غوره دي، دا خپله ددې ښودونکی دی…. 

 

لارا لوګن:

دا د افغان مسؤولینو څرګندونې دي،

 

جمهور رئیس کرزی:

د افغانستان حکومت داسې وایي؟ ښه، که د افغانستان حکومت داسې وایي، هغوی حق نلري، او زه خپله غواړم له هغوی نه واورم، ماته یې هېڅکله ندي ویلي، دوه ورځې مخکې ددغه ولایت والي، امنیه قوماندان، د ملي امنیت رئیس او قومي مشرانو له ما سره کتنه درلوده. خو د امریکا له متحده ایالاتو سره زموږ د اړیکو په اړه، ډېر کارونه دي چې په ښه ډول یې صورت نیولی دی، د روغتیایي خدمتونو، پوهنې، اقتصاد، سړک جوړولو او نورو برخو کې ډېر ښه والی راغلی دی، خو یوه مسأله شته چې موږ یې په اړه په جدي توګه قهرېدلي او ناراضه یو.

 

لارا لوګن:

دا څه دي چې تاسو یې قهرولي یاست؟

 

جمهور رئیس کرزی:

هغه د ملکي تلفاتو مسأله ده، د افغانستان له حکومت سره ناسم چلند، په انتخاباتو کې لاسوهنې، په افغانستان کې پراخه فساد، دا ټول مسایل دي، اوس یو له بل سره همکار یو، هغه هم ستراتیژیک همکار، افغانانو د دوو دلایلو له مخې له دې همکارۍ سره موافقه وکړه:

اول: د هغه څه په اړه اطمینان حاصلول چې افغانستان د بهرنیو ځواکونو له وتلو وروسته د یوې ښې راتلونکي په لور ګام اخلي؛

دویم: د ستراتیژیکو همکاریو په نتیجه کې، بالاخره له افغانستان سره د بهرنیانو د معین رفتار اړخونه او د افغانانو تلفات به تغییر وکړي، بناءً موږ د متقابل احترام پر اصولو ولاړو اړیکو ته چې په هغه کې د امریکا حکومت د افغانستان د خلکو فرهنګ، دودونو او عنعناتو ته درناوی وکړي او له موږ سره د یوه مستقل دولت په توګه چلند او رفتار وکړي، سترګې په لاره یو.

 

لارا لوګن:

خو امریکایان په تاسو نیوکه کوي، هغوی فکر کوي چې افغانستان ته لېږل شوې ټولې د مرستې پیسې او امریکایي ځواکونه، په دې خاوره کې ضایع شوي دي او ځینې یې پوښتنه کوي چې تاسو څه ډول د امریکا همکار یاست؟ 

 

جمهور رئیس کرزی:

موږ د امریکا د مالیې ورکوونکو او د هغوی د مالي مرستو له امله قدرداني کوو، او ددوی هغه زیار ته چې په خپله خاوره کې یې ګالي، احترام کوو. پوهېږم چې د امریکا پیسې له زحمت پرته او په آسانۍ، نه تر لاسه کېږي، پوهېږو، تاسو د هغه د پیداکولو په مقابل کې په امریکا کې کار کړی دی، هغه پیسې مو لاسته راوړي، نو موږ ورته احترام کوو، د افغانستان په هره برخه کې چې داسې پیسې لګول شوي دي، موږ یې ډېرې ارزښتمنې بولو، زما نیوکه نه د امریکا خلکو ته متوجه ده او نه هم د امریکا د مالیې ورکوونکو مرستو ته، موږ هغو ته احترام لرو، خو زما نیوکه د هغوی پالیسیو او د چلند ډول ته متوجه ده چې د امریکا له متحده ایالاتو نه استازیتوب کوي، په یو شکل ددغه رفتار او سیاستونو د تغییر او اصلاح غوښتونکي یو، پدې برخه کې ډېر ښه والی راغلی دی، پر ملکي اهدافو بمباري په بشپړه توګه کمه شوې ده او ددې موخې د لاسته راوړلو لپاره، جنرال آلن ډېره هڅه وکړه، د شپې بریدونه د هغو څو کلونو هڅو او کار له امله چې په ګډه توګه مو تر سره کړل، کم شوي دي،  بالاخره پدې بریالي شوو چې امریکایان او متحدین یې دېته واداره کړو تر څو د امنیتي شرکتونو له ملاتړ څخه لاس واخلي.

 

لارا لوګن:

امنیتي خصوصي شرکتونه؟

 

جمهور رئیس کرزی:

خصوصي امنیتي شرکتونه چې اوس تر یوه حده د حکومت په مدیریت کې راغلي دي، خو لا اوس هم په دې برخه کې راضي نه یو، نو په همدې اساس، ځینې دلایل وو چې له امریکا سره د اړیکو د ترینګلتیا او د دوی په اړه د افغانانو د ذهنیت د خرابوالي سبب وګرځید، په داسې حال کې چې دوی ته ډېر احترام هم لري او لازمه ده چې له هغه نه یادونه وکړو، څلور کاله مې په فردي ډول هڅه وکړه چې دا ستونزه له امریکا سره حل کړم، خو هغه ځای ته ونه رسېدو چې غوښتل مو، وروسته مې د اعتراض په ډول خپل غږ پورته کړ او هغه هم د یوې اړتیا له مخې و.

 

لارا لوګن:

تاسو وایاست چې فساد افغانستان ته راوړل شو؟

 

جمهور رئیس کرزی:

 هو!

 

لارا لوګن:

په امریکا کې خلک دا ذهنیت لري چې تاسو د یوه داسې حکومت ریاست په غاړه لرﺉ چې فساد په هغه کې په لوړه کچه شتون لري او تاسو هم د هغه د له منځه وړلو لپاره جدي اقدامات نه کوﺉ.

 

 

جمهور رئیس کرزی:

هو، سمه ده! د یوه داسې حکومت ریاست په غاړه لرم چې په هغه کې فساد په لوړه کچه شتون لري.

 

لارا لوګن:

آیا ددې ستونزې د له منځه وړلو لپاره مو کوم اقدام کړی دی؟

 

جمهور رئیس کرزی:

هو!، موږ په دې برخه کې ډېر کارونه تر سره کړي دي، خو هغه فساد چې اوس په افغانستان کې وجود لري، کله هم پخوا نه و لیدل شوی، آیا افغانان په یو ځلي او یوه شپه کې په یوه داسې فاسد نظام بدل شوي چې اوس یې شاهدان دي؟

 

لارا لوګن:

یو چا راته وویل چې د افغانستان نظام تل فاسد پاتې شوی؟

 

جمهور رئیس کرزی:

نه، حقیقت نلري. د کمونیستي حکومت په وخت کې چې روسان او کمونستان دواړه له یو بل سره وو، حتی د نن ورځې ۵٪د نن ورځې فساد یې نه درلود او دا هغه وخت و چې شوروي خپلې ټولې پیسې او تجهیزات د افغانستان د حکومت له لارې په مصرف رسول او فساد حتی د نن ورځې ۵په سلو کې نه و، په هغه وخت کې د خصوصي امنیتي شرکتونو لخوا غلا او چپاول نه و، ددغو خصوصي امنیتي شرکتونو د موجودیت له امله زموږ لویې لارې ناامنه وې، په همدې خاطر و چې ما د څو کلونو لپاره دا مسأله د امریکا حکومت ته مطرح کړه، پخواني شوروي اتحاد د حکومت د لوړ پوړو او یا بانفوذه چارواکو خپلوانو، وروڼو او یا تړلو اشخاصو ته پروژې په قرارداد نه ورکولې، خو امریکایانو دا کار وکړ، له دې سره سره مې په کلونو له دوی نه وغوښتل چې دا کار ونکړي، امریکایانو دې کار ته ادامه ورکړه، دوی په بشپړ غیر شفافیت کې او له یوه لاس نه څو لاسونو ته چې حتی کیفیت پکې بیخي له منځه لاړ، قراردادونه وسپارل، او دغه راز یې نور ډېر کارونه وکړل چې باید نه وای شوي.

 خو د ملامتۍ او تقصیر بار زموږ پر اوږو را اچوي، په یوه داسې کار کې چې موږ هېڅ ډول تقصیر نلرو. زه او د افغانستان حکومت یوازې د هغه فساد په وړاندې مسؤول یو چې د افغانستان په نظام کې د موجودو اشخاصو لخوا صورت نیسي، چې د هغه اندازه ډېره کمه ده، خو په میلیونونو او په سلګونو میلونونو ډالره چې نه له موږ سره شته او نه یې په اړه څه پوهېږو،…. په دې برخه کې مې له جمهور رئیس اوباما او نورو امریکایي چارواکو سره په تفصیل بحث کړی دی چې له افغانستان څخه هغه وخت فساد ورک کېږي چې زموږ متحدین د هغه د رېښو په ایستلو کې په غوڅه توګه له موږ سره ژمن شي.

 

لارا لوګن:

آیا تر اوسه ستاسو متحدینو له تاسو سره ژمنه کړې ده؟

 

جمهور رئیس کرزی:

هو، دوی له موږ سره ژمنه کړې خو په لفظ کې، په دې برخه کې ډېر کم ښه والی راغلی، تراوسه هم د هغو قرادادي شرکتونو فهرست ته په تمه یم چې د امریکا حکومت د افغانستان په حکومت کې هغوی ته پروژې ورکړي، د پارلمان په وکیلانو کې، په حکومت کې، په سیاسي کړیو او نورو برخو کې،  د افغانستان بانک پخوانی رئیس په امریکا کې شپې او ورځې تېروي چې د کابل بانک له قضیې او د سلګونو میلیون ډالرو له ضایع کېدو وروسته هغه ځای ته وتښتېد. امریکا باید هغه د افغانستان حکومت ته وسپاري، که غواړي چې رښتیا د فساد پر خلاف مبارزه وکړو.

 

لارا لوګن:

داسې په نظر رسیږي چې ستاسو په وینا امریکا او نړیواله ټولنه په افغانستان کې دستر فساد مسووله ده؟

 

 

 

 

جمهور رئیس کرزی:

هو!، ډیره زیاته، موږ پوهیږو چې د دغه فساد یوه برخه له باندې څخه د افغانستان د بنسټونو دکمزورتیا په موخه په قصدي ډول د دغو بنسټونو دککړتیا او له هغو څخه داستفادې لپاره سازمان ورکول کیده.

 

لارا لوګن:

خو دغه چاره افغانان له خپل مسوولیت څخه نه خلاصوي!

 

جمهور رئیس کرزی:

هو! دغه چاره هیڅکله هم موږ له دغه مسوولیت څخه نه خلاصوي، موږ په بشپړه توګه د هغه څه مسوول یو چې په افغانستان کې رامنځه کیږي، او ستونزه همدا ده، موږ له دې پرته چې د یو څه د درولو صلاحیت ولرو مسوول ګڼل کیږو، زموږ مسوولیت نه خلاصیږي او موږ دا درک کوو چې زموږ ټولنه له فساد څخه خلاص یو حکومت ته اړتیا لري او د افغانستان خلک دا غواړي، په یو افغانستان کې چې زه غواړم ماشومان مې هلته ژوند وکړي، ښوونځي ته لاړ شي او هلته و روزل شي، هغه باید داسې افغانستان نه وي چې فساد پکې غوغا وکړي او یا هم له واک څخه ناوړه استفاده وشي، په همدې دلیل دی او دا چاره موږ هغې پوښتنې ته بیایي چې په پرله پسې ډول مو له بیلابیلو لارو څخه د هغې په باب بحث کړی دی، او هغه دادی چې زموږ ستراتیژیکه همکاري باید د امریکا له متحده ایالاتو سره په افغانستان کې له فساد څخه د خلاص، وړتیا لرونکي او د موکراتیک دولت د جوړیدو په موخه وي.

 

لارا لوګن:

موږ اوریدلي چې امریکا د افغانستان د دولت له وسله والو مخالفینو سره د روغې جوړې له بهیر څخه لاس اخیستی او حتی نوره هڅه نه کوي چې له طالبانو سره مذاکره وکړي، آیا دا خبره حقیقت لري؟

 

 

 

جمهور رئیس کرزی:

موږ معلومات نه لرو. د یو زیات وخت لپاره، د روغې جوړې بهیر یوازې یو افغاني جریان و او زموږ متحدینو په دې اړه مرسته نه کوله او بیا د قطر بهیر تر هغه مهاله  چې موږ په هغه اعتراض ونکړ په هغه کې ښکیل نه وو او بیا مو اجازه ورکړله چې دغه بهیر دوام ومومي، دغه جریان تقریبا له منځه لاړ، له دې امله موږ اوس هم د دې انتظار لرو چې دټولو مسوولو اړخونو په ملاتړ د روغې جوړې یو معتبر بهیر تحقق ومومي.

 

لارا لوګن:

نو، د سولې هیڅ ډول بهیر اوس شتون نه لري؟

 

جمهور رئیس کرزی:

نه،  له هغو هڅو پرته چې موږ یې د خپل هېواد په دننه کې کوو او له پاکستاني لوري سره هم خبرې اترې کوو اوس مهال، په عملي ډول څه وجود نه لري.

 

لارا لوګن:

آیا داسې شواهد لری چې د امریکا متحده یالات هڅه کوي چې په دې باب کوم کار ترسره کړي؟

 

جمهور رئیس کرزی:

هیڅ ډول شواهد نه لرو!

 

لارا لوګن:

هېڅ ډول شواهد؟

 

جمهور رئیس کرزی:

نه، نه یې لرو!

 

 

لارا لوګن:

نو څه احساس لری؟

 

جمهور رئیس کرزی:

موږ د افغانانو په توګه هر هغه کار مو چې په توان کې دی د سولې بهیر ته د رسیدو لپاره به یې ترسره کړو.

 

لارا لوګن:

آیا دا واقعیت لري چې پاکستان تل هڅه کوي چې ستاسو هڅې سبو تاژ کړي تر څو وکولای شي دسولې بهیر په خپل کنټرول کې ولري؟

 

جمهور رئیس کرزی:

پاکستان له موږ سره په تیرو درې کلونوکې نیږدې همکاري لرلې ده، مثبتې بیانیې خپرې کړي دي او سمې لارې چارې یې هم توضیح کړي دي، خو لا تراوسه  د پاکستان له لوري د عملي ګامونو د اخیستلو په انتظار یو، هیله لرو چې عملي ګامونه پورته شي.

 

لارا لوګن:

نو مذاکرې ډیرې دي، خو نتیجه هیڅ؟

 

جمهور رئیس کرزی:

هو!، مذاکرې ډیرې دي خو عمل لږ!

لارا لوګن:

پاکستانیانو ملابرادر چې د طالبانو له مشرتابه سره ستاسو د اړیکې په ټینګښت کې د آسانتیا رامنځته کوونکی و، ونیولو….

 

جمهور رئیس کرزی:

له بده مرغه،هو! خو موږ د هغه د خلاصون غوښتونکي یو.

 

لارا لوګن:

داسې ښکاري چې دغه اقدام به ستاسو د نفوذ د مخنیوي په موخه طرحه شوی وي؟

 

جمهور رئیس کرزی:

داسې ښکاري چې دغه اقدام به د سولې د بهیر پرخلاف وي!

 

لارا لوګن:

د سولې د هغه بهیر پرخلاف چې تاسو هغه تعقیبولو؟

 

جمهور رئیس کرزی:

هو، د افغانستان د سولې بهیر !

 

لارا لوګن:

هغه څه چې په دې وروستیو کې یې په اړه غږونه پورته شول او د ډیرو پاملرنه یې ځان ته جلب کړه، د افغان امنیتي ځواکونو په یو نیفورم کې د دښمنانو لخوا پر نړیوالو ځواکونو باندې دب ریدونو زیاتیدل دي چې دټولو د جدي اندیښنې وړ ده. آیا د امریکا دغه نظر منی چې طالبان یوازې په سلوکې پنځه ویشت ددغو بریدونو مسوول دي؟، آیا تاسو هم  په همدې نظر یاست؟

 

جمهور رئیس کرزی:

دا یوه ډیره خواشینونکې پدیده ده، په هغو سربازانو برید چې افغان اردو ته زده کړه ورکوي، په هغو عسکرو برید چې د افغانستان پولیس ته روزنه ورکوي، افغان امنیتي ځواکونو ته سلا مشوره ورکوي، دغه بریدونه  خواشینونکي، د تاسف وړ او دافغانانو د میلمه پالنې د روحیې خلاف دي.

 

لارا لوګن:

دغه بریدونه د افغانانو او د امریکایي ځواکونو ترمنځ د بې اعتمادۍ په رامنځته کولو کې هم موثر وو؟

 

جمهور رئیس کرزی:

یقیناً، دغه بریدونه ستراتیژیکه ستونزه ده، هغه ستونزه چې هغې ته رسیده ګي د خپل ځان او د افغانانو جدي مسوولیت ګڼم چې باید دغې ستونزې ته رسیده ګی وکړي. د فیصدۍ  له مخې د دغو بریدونو ویش چې مسوولیت یې طالبانو او نورو ته راجع کیږي، ستونزمن کار دی خو کولای شم درته ووایم چې دغه بریدونه په دوه برخو ویشل کیږي.

دغه بریدونه  د افغانستان د اردو او ملي پولیسو ځواکونو ته زموږ د متحدینو لخوا د روزنې له ورکولو څخه د مخنیوي په موخه طرحه شوي دي، زموږ یو شمېر ګاونډي هېوادونه داسې یو افغانستان چې د اردو او پولیسو پیاوړي بنسټونه ولري د خپل ځان په ګټه  نه بولي، له بده مرغه دغه بریدونه  د افغانستان د ملي اردو د جوړیدو د بهیر د ګډوډولو او په دغه بهیر کې د افغانستان د متحدینو، نړیوالو دوستانو په ځانګړي ډول د امریکا د متحده ایالاتو له ونډې اخیستنې څخه د مخنیوي لپاره طرحه شوي دي.

 

لارا لوګن:

هغوی نسبتاً د خپل دغه هدف د تحقق په لاره کې بریالي شوي دي ځکه چې دافغانستان په یو شمېر سیموکې د افغان امنیتي ځواکونو د روزنې چارې دریدلې دي.

 

جمهور رئیس کرزی:

د دغې پدیدې بل دلیل په تیرو لسو کلونوکې د بهرنیو ځواکونو له کړنو، په دواړو لوروکې فرهنګي حساسیتونو ته د نه پاملرنې ، د ملکي وګړو د مرګ ژوبلې او د هغې جګړې له امله چې د افغانستان په کلیو او بانډوکې باید ترسره نه شي، سرچینه اخلي، زه له پیل څخه د تروریزم پرخلاف د مبارزې له دې ډول سره مخالف وم. زما په نظر د دغو بریدونو بل دلیل په ځانګړي ډول د تیرې میاشتې په ۵نېټه یو سازمان ورکړل شوی فعالیت و. په تېرکې دا ډول بریدونه زموږ لپاره د ډیرې جدي اندیښنې وړ نه وو، خو په وروستیو پینځه میاشتو کې دغه بریدونه د سازمان ورکړل شویو او پلان شویو فعالیتونو بیانوونکي دي چې نه شو کولای فرهنګي مسلې او نور لاملونه د هغو سرچینه وبولو، بلکې دښمن غواړي او په دې هڅه کې دی چې د افغانستان د امنیتي ځواکونو د روزنې بهیر ګډوډ،مغشوش او هغه ودروي.

 

لارا لوګن:

نو فردي ګرایشونه پر بهرنیو ځواکونو باندې د اکثرو وروستیو  بریدونو سبب نه ګڼل کیږي؟

 

جمهور رئیس کرزی:

نه، مخصوصاً په تیرو څلورو میاشتو کې د دغو بریدونو په شمېر کې د زیاتوالي شاهدان وو. دا داسې مسله ده چې د هغې په اړه مو په تفصیل سره بحث کړی دی، هغه ستونزه چې ما پخپله د هغې د اصلاح مسوولیت په غاړه اخیستی دی.

 

لارا لوګن:

نو، د جنرال آلن له ارزیابۍ سره موافق نه یاست؟

 

جمهور رئیس کرزی:

موږ له هغې ارزیابۍ سره چې تاسو یې نوم یاد کړ، اختلاف نه لرو.

 

لارا لوګن:

خو ستاسو په باور دغه بریدونه له ۲۵فیصدو څخه زیات دي چې امریکا یې پخپله څیړنه کې ښکاره کوي؟

 

جمهور رئیس کرزی:

نه شم کولای له فیصدیو څخه په دې ځای کې خبرې وکړم. ډیره سخته ده چې ووایم دغه بریدونه ۲۵سلنه دا ډول،۱۵سلنه هغه ډول، ۲۰سلنه دا ډول وو، نه، زما توضیحات دا ډول نه دي، زه دا بریدونه په عمومي توګه توضیح کوم، تر زیاته بریده  دا ډول بریدونه د ماهیت او تکرار له پلوه څرګندوم.

 

لارا لوګن:

نو د هغه د ماهیت او تکرار په پام کې نیولو سره، باید دغه بریدونه ستراتیژیک وګڼو؟

 

 

جمهور رئیس کرزی:

 سم مو وفرمایل، د دغو بریدونو ماهیت او تکرار په تیرو څلورو، پینځو او یا شپږو میاشتوکې، تسلسل ښکاره کوي، نو دغه تسلسل څرګندوي چې دا د یو قهریدلي او په غصه شوي سرباز کار نه و، بلکې یو سازمان ورکړل شوی او پلان شوی فعالیت و چې له باندې نه سرچینه اخلي.

 

لارا لوګن:

آیا امریکا پر تاسو فشار راوړی چې پر دغې مسلې باندې په علني ډول تاکید ونه کړی؟

 

جمهور رئیس کرزی:

نه، امریکا داسې نه دي ویلي، خو برعکس زموږ غونډې له هغې څخه لا ډیرې دوستانه دي، او شاید داسې موارد هم وي چې د یو شمېر مسلو په اړه موږ په غصه شوو.

 

لارا لوګن:

په امریکا کې برداشت دادی چې ګویا افغانستان دیو موټي هېواد پرځای له قبیلوي او قومي ځواکونو څخه جوړ یو هېواد دی، آیا کولای شو چې دا دافغانستان لپاره یو امتیاز وګڼو؟

 

جمهور رئیس کرزی:

هیڅکله نه، په بشپړه توګه ناسمه خبره ده، دا هغه ستونزه ده چې غربي رسنۍ او د دغو هېوادونو څیړنیز مرکزونه یې د افغانستان په اړه لري. افغانستان د نړۍ په دې سیمه کې تر ټولو لرغونو دولتونو څخه شمېرل کیږي، افغانستان هغه مهال یو دولت و چې د نړۍ نني یو شمېر هېوادونو اصلا شتون نه درلود، زموږ هېواد بلواګانې، یرغلونه، جګړې او ډیرې لوړې ژورې لیدلې دي چې شاید په نړۍ کې ډیر لږ شمېر ملتونه په دې وتوانیږي له داسې ستونزو څخه ژوندي را ووځي. نو دا  ټول د داسې یوه ملت څرګندونه کوي چې قوي بنسټ لرونکې لرغونتیا او لید لوری یې په تاریخ کې  ژورې ریښې لري.

 

 

 

 

لارا لوګن:

آیا اوسنی نظام ـ یعنې قوي مرکزي دولت، پر دغه هېواد باندې د حکومت کولو لپاره مناسبه او ښه لاره ده؟

 

جمهور رئیس کرزی:

په اوسنیو شرایطو کې، هو!، افغانستان له کلونو کلونو بې نظمیو او آنارشي، له ناوړه حالت، او دبې خاونده توب په څېر حالت څخه نوی راوتلی دی، په داسې یو حالت او شرایطوکې خلک یوازې  د یو داسې قوي حکومت د جوړیدو غوښتونکي وو چې وکولای شي هېواد بیرته یو موټی او د هغه د بنسټونو او زیربناوو په جوړولو لاس پورې کړي، په یو شمېر ټاکلو ساحوکې دا کار ترسره شوی دی، افغانان اوس هم په یو قوي حکومت باندې باورلري. مرکزي قوي نظام  ولایتونو ته د واک د نه ورکولو په معنی نه دی، موږ سیمه ایزو ادارو، سیمه ایزو بنسټونو، سیمه ایزو شوراګانو او ولایتي شوراګانو ته د لازیات واک د ورکولو، د بودجې د زیاتولو او د بودجې د مصرف لپاره د لا ډیرو صلاحیتونو د ورکولو لپاره ډیر کار کړی دی. خو فدرالي نظام هغه پدیده ده چې د افغانستان خلکو هغه نه دی غوښتی او نه هم د افغانستان لپاره مناسب دی. دا ډول نظام  د حکومت او دولت په اړه  د خلکو د فکري طرز مخالف دی.

 

لارا لوګن:

نو له دغو ټولو کلونو وروسته، آیا ستاسو د هېواد په اړه د امریکایانو درک ښه شوی دی؟

 

جمهور رئیس کرزی:

د هغوی یو شمېر هو!، خو داکثریتو نه!

 

لارا لوګن:

د وروستي ځل لپاره مو چې د کابل په سړکونوکې قدم  وواهه، کوم وخت و؟

 

جمهور رئیس کرزی:

په همدې وروستیو کې و، شاوخوا یوه میاشت وړاندې!

 

لارا لوګن:

آیا د دې آزادي لرې هر وخت چې دې زړه وغواړي دکابل په سړکونو کې قدم و وهې؟

 

جمهور رئیس کرزی:

هو!، که مصروف ونه اوسم، او د قدم وهلو لپاره وخت ولرم!

لارا لوګن:

افغانان او امریکایان باید څوک د جګړې د نه پای ته رسیدلو او د افغانستان د خلکو د راتلونکې د نه روښانتیا مقصر وګڼي؟

 

جمهور رئیس کرزی:

زموږ د خلکو راتلونکی نا معلوم نه دی، له افغانستان څخه د امریکایي عسکرو او نورو نړیوالو ځواکونو وتل به زموږ حالت له هغه څخه خراب نه کړي لکه څنګه چې اوس دی، موږ په عین حالت کې قرار ولرو او پرمختګ ته به دوام ورکړو، زه بد بین نه یم.

 

لارا لوګن:

تاسو منفي ګرا نه یاست خو یو زیات شمېر افغانان په دې باور دي چې د امریکایي ځواکونو له وتلو وروسته به، افغانستان کورنیو جګړو ته لاړ شي؟

 

جمهور رئیس کرزی:

نه، اصلاً نه، افغانستان هیڅکله د کورنیو جګړو شاهد نه و، حتی تېرمهال، دا زموږ ګاونډي هېوادونه او په هغوي پورې تړلې ډلې وې چې له یوبل سره په جګړې اخته وې، نه زموږ خلک. که دا زموږ خلک و چې له یو بل سره یې جګړه کوله ، هېواد به هیڅکله هم پر هماغه مهال یو موټی نه و، لکه څنګه چې نن یو موټی دی.

وګوری، د نړۍ په دې برخه کې، موږ یو موټی هېواد یو، ټول واک ته د رسیدو لپاره په کابل کې مبارزه کوي، او دا چاره د یووالي په معنی ده، له دې امله زه اصلاً اندیښنه نه لرم، زه په افغانستان کې د راتلونکي ثبات او امنیت څخه هیڅ ډول اندیښنه نه لرم خو د افغانانو د اقتصادي سوکالۍ څخه اندیښنه لرم، په افغانستان کې له بنسټ جوړونې څخه اندیښنه لرم، د افغان امنیتي ځواکونو د پیاوړتیا په باب اندیښنه لرم، د ترهګرۍ پرخلاف د مبارزې  له اړخه اندیښنه لرم، که حالات په همدې ډول پاتې شي او یا هم خراب شي، زما اندیښنه د افغانستان په باب نه ده، بلکې د سیمې لپاره ده، که له ماڅخه مې د اندیښنو په اړه وپوښتې، زما اندیښنه د افغانستان په اړه نه، بلکې د سیمې په اړه ده.

 

لارا لوګن:

ستاسو ترټولو جدي ویره څه ده؟

 

جمهور رئیس کرزی:

زما جدي ویره داده چې سیمه له لا بې نظمۍ او بې ثباتۍ سره مخامخ کیږي، له بده مرغه په پاکستان کې حالت ته وګوری، له پاکستان څخه ها خوا وګوری، زما اندیښنه له سیمې څخه ده نه له افغانستان څخه، موږ به خپلې چارې په ښه ډول پرمخ یوسو، زما په باور، په ټوله سیمه کې به زموږ هېواد په ښه ډول پرمخ لاړ شي.

 

 لارا لوګن:

نو، امریکایانو ته چې احساس کوي له دغو کلونو وروسته، افغانستان ښه پرمختګ نه دی کړی، او په افغانستان کې د خپل حضور لپاره هیڅ دلیل هم نه ویني، څه وایي؟

 

جمهور رئیس کرزی:

دکلونو له تیریدو وروسته به، زه امریکایانو ته  ونه وایم چې لاس ته راوړنه مو نه لرله، بلکې هغوی یعنې د امریکا خلکو ته به ووایم چې موږ یې له مرستو څخه مننه او قدرداني کوو، موږ د امریکا دمالیه ورکوونکو له پیسو څخه مننه کوو ځکه چې دهغوی مرستو دافغانستان خلکو ته ډیرڅه بخښلي دي، لکه ښه روغتیایي خدمتونه، ښه پوهنه، ښه سړکونه، په ټول هېواد کې ښځو او ماشومانو ښه معیشت، ورته وایم چې له افغانستان څخه یې ملاتړ له حده زیات ارزښت لري او موږ یې د دوام غوښتنه کوو، دامریکا حکومت ته به ووایم چې د افغانستان په اړه خپل تفکر زموږ د تفکر په رڼا کې  یو خیل کړي او زموږ خبروته غوږ ونیسي.

 

لارا لوګن:

یعنې چې اوس مو خبروته غوږ نه نیسي؟

 

جمهور رئیس کرزی:

زموږ خبرو ته دې لا ښه غوږ ونیسي، او که چیرې د ترهګرۍ پرخلاف د مبارزې لپاره دلته راغلي دي، باید چې په سمو هدفونو باندې تمرکز وکړو او بل دا چې د ترهګرۍ پرخلاف جګړه باید د افغانستان په کلیو کې ترسره نه شي، بلکې د هغې په پټنځایونوکې دې ترسره شي.

لارا لوګن:

په پاکستان کې؟

 

جمهور رئیس کرزی:

د تروریزم په پټنځایونوکې!

 

لارا لوګن:

پټنځایونه په پاکستان کې دي؟

 

جمهور رئیس کرزی:

هو، په پاکستان کې دي!

 

لارا لوګن:

آیا په امریکا کې له موجودې ادارې څخه نا امیده یې؟

 

جمهور رئیس کرزی:

نه، زه  له اوسنۍ او یا هم له پخوانۍ ادارې څخه د نا امیدۍ په اړه خبرې نه کوم، بلکې د هغو پالیسو په باب خبرې کوم چې اغیزمنې نه وې، د هغو لارو چارو په باب غږیږم چې نتیجه یې نه ده ورکړې او د هغو اصلاحاتو په اړه خبرې کوم چې باید په دې باب ترسره شي.

 

 

لارا لوګن:

ښاغلی جمهوررئیس، ډیره زیاته مننه! د ویاړ ځای دی چې له تاسو سره مې خبرې وکړې!

 

جمهور رئیس کرزی:

ډیره ښه راغلې!